Mar 3 | NdeIBE | STEP | Ngesinye isikhathi wangena esinagogini, kukhona lapho indoda elesandla esitshwabheneyo.

Mark 3

1 Ngesinye isikhathi wangena esinagogini, kukhona lapho indoda elesandla esitshwabheneyo. 2 Abanye babo babedinga izaba lokwethesa uJesu icala, yikho bamlinda ukubona ingabe wayezayelapha yini ngeSabatha. 3 UJesu wathi endodeni yesandla esitshwabheneyo, “Sukuma ume phambi kwabo bonke.”

4 UJesu wasebabuza wathi, “Kuyini okusemthethweni na ngeSabatha; ukwenza okuhle loba ukwenza okubi, ukuhlenga impilo kumbe ukubulala?” Kodwa bathula zwi.

5 Wabakhangela ngolaka, ehlutshwa yibuqholo bezinhliziyo zabo, wasesithi kuleyondoda, “Yelula isandla sakho.” Yaselula, isandla sesilunge saphelela.

6 AbaFarisi basebephuma bayacebisana lamaHerodi ukuthi bangambulala njani uJesu.

Izixuku Zilandela UJesu

7 UJesu wasuka labafundi bakhe baya ngasechibini, ixuku elikhulu labalandela lisuka eGalile. 8 Bathi ngokuzwa konke ayekwenza abantu abanengi beza kuye besuka eJudiya, eJerusalema, e-Idumiya lemimangweni engaphetsheya kweJodani lezindaweni zeThire leSidoni. 9 Ngenxa yobunengi babantu watshela abafundi bakhe ukuba bamlungisele isikepe esincane ukuze angaminyezelwa ngabantu.

10 Phela wayesesilise abanengi, yikho labo ababelezifo babeminyezela befuna ukumthinta.

11 Kwakusithi imimoya emibi ingambona iguqe phambi kwakhe imemeze ithi, “UyiNdodana kaNkulunkulu.” 12 Kodwa wayiqonqosela ukuthi ingaze yakhuluma ukuthi ungubani.

Ukukhethwa Kwabaphostoli Abalitshumi Lambili

13 UJesu wakhwela entabeni wabiza labo ayebafuna, beza kuye.

14 Wehlukanisa abalitshumi lambili wabamisa ukuba ngabaphostoli ababezakuba laye ukuze abathume ezindaweni bayotshumayela

15 lokuba lamandla okukhupha amadimoni.

16 Yilaba abalitshumi lambili abamisayo: uSimoni (ametha ibizo wathi nguPhethro);

17 uJakhobe indodana kaZebedi lomfowabo uJohane (laba wabetha ibizo wathi bangoBhowaji, okutsho ukuthi Amadodana Omdumo); 18 u-Andreya, uFiliphi, uBhatholomewu, uMathewu, uTomasi, uJakhobe indodana ka-Alifewu, uThadewu, uSimoni umZilothi 19 loJuda Isikariyothi owamnikelayo.

UJesu LoBhelizebhubhi

20 UJesu wangena kwenye indlu, kwaphinda njalo kwabuthana kuye ixuku, yena labafundi bakhe baze behluleka ukudla. 21 Kwathi abendlu yangakwabo bekuzwa lokho bamlanda ukuyambuyisa ngoba bathi wayesephambene.

22 Kwathi abafundi bomthetho abehla bevela eJerusalema bathi, “Ungenwe nguBhelizebhubhi! Uxotsha amadimoni ngenkosi yamadimoni.”

23 Yikho uJesu wasebabiza wakhuluma labo ngemizekeliso: “Kambe uSathane angamkhupha kanjani uSathane?

24 Aluba umbuso udabukene uvukelana, lowombuso ngeke ume. 25 Uma indlu ivukelana, leyondlu ngeke ime. 26 Njalo nxa uSathane eziphikisa, edabukene, ngeke ame; useyatshabalala. 27 Phela kakho ongangena endlini yesiqhwaga, abuthe izimpahla zaso ngaphandle kokuthi aqale asibophe lesosiqhwaga, anduba ayiphange indlu yaso.

28 Ngilitshela iqiniso ukuthi zonke izono lezihlambazo zabantu zizathethelelwa.

29 Kodwa loba ngubani ohlambaza uMoya oNgcwele akayikufa wathethelelwa; ulecala lesono saphakade.”

30 Wakutsho lokhu ngokuba babesithi, “Ulomoya omubi.”

Unina KaJesu Labafowabo

31 Kwasekufika unina kaJesu labafowabo. Bema phandle bathuma omunye umuntu ukuyambiza. 32 Abantu abanengi babehlezi bemhanqile, basebemtshela bathi, “Unyoko labafowenu baphandle bayakudinga.”

33 Wabuza wathi, “Ngobani abangumama labafowethu na?”

34 Wasekhangela labo ababehlezi laye bemhanqile wathi, 35 “Nampa abangumama labafowethu! Loba ngubani owenza intando kaNkulunkulu ngumfowethu, ngudadewethu njalo ngumama.”